लासलगावकरांचा महावितरणला गुलाबपुष्पातून इशारा!
शहर विकास समितीचे गांधीगिरी आंदोलन; वारंवार वीज खंडित होणे आणि अंदाजे बिलांच्या वसुलीवर तीव्र नाराजी
न्यायभूमी
लासलगाव दिनांक १४ ऑक्टोंबर कैलास उपाध्ये
लासलगाव शहरात शारदीय नवरात्रोत्सव सुरू असताना गेल्या तीन ते चार दिवसांपासून दररोज संध्याकाळी चार ते पाच तास वीजपुरवठा खंडित होत असल्याच्या तक्रारींमुळे नागरिक त्रस्त झाले आहेत. सणासुदीच्या काळात होत असलेल्या या गैरसोयीच्या निषेधार्थ लासलगाव शहर विकास समितीच्या वतीने महावितरणविरोधात गांधीगिरी आंदोलन करण्यात आले.
यावेळी संबंधित अधिकाऱ्यांना गुलाबपुष्प देऊन मागण्यांचे लेखी निवेदन सादर करण्यात आले.
स्मार्ट मीटर नसलेल्या ग्राहकांच्या बिलांवर आक्षेप
स्मार्ट मीटर बसवलेले नसलेल्या काही ग्राहकांना प्रत्यक्ष मीटर रीडिंग न घेता अंदाजे २०० ते ३४० युनिटची बिले दिली जात असल्याचा समितीचा आरोप आहे. त्यानंतर मीटर नादुरुस्तीचे कारण देत जुने मीटर काढून स्मार्ट मीटर बसवले जात असल्याचेही निवेदनात नमूद करण्यात आले.
अंदाजे बिलांची रक्कम मोठी असल्याने ग्राहकांवर आर्थिक भार पडत असून, चुकीची बिले भरण्यासाठी दबाव आणला जात असल्याची तक्रार समितीने केली आहे. या प्रकाराची चौकशी करून ग्राहकांना योग्य बिल द्यावे आणि मनमानी पद्धतीने होणारी वसुली थांबवावी, अशी मागणी करण्यात आली.
अधिकाऱ्यांना गुलाबपुष्प; लेखी निवेदन सादर
लासलगाव उपविभागातील उपकार्यकारी अभियंता कार्यालयात सहाय्यक अभियंता अजय सावळे आणि कनिष्ठ अभियंता नितीन निकम यांना गुलाबपुष्प देऊन मागण्यांचे निवेदन देण्यात आले.
शांततामय मार्गाने आंदोलन करत समितीने नागरिकांच्या समस्या तातडीने सोडवण्याची मागणी केली.
समितीचा इशारा : सुधारणा न झाल्यास जनआंदोलन
वीजपुरवठ्यातील वारंवार खंड, अंदाजे बिलांची पद्धत आणि चुकीच्या बिलांबाबतच्या तक्रारींची दखल घेऊन महावितरणने तातडीने कार्यवाही करावी. अन्यथा आगामी काळात मोठे जनआंदोलन उभारण्यात येईल, असा इशारा शहर विकास समितीच्या सदस्यांनी दिला.
आंदोलनात सहभागी
या आंदोलनावेळी शहर विकास समितीचे प्रकाश पाटील, धर्मेश जाधव, संदीप उगले, प्रमोद पाटील, चंद्रकांत नेटारे, राजेंद्र कराड, शेखर कुलकर्णी, विकास कोल्हे, संतोष बोराडे, महेश बकरे, उत्तम वाघ, अनिल भागवत, संतोष कोटकर, संतोष पानगव्हाणे, नरेंद्र व्यास, अनिल भावसार, मोरे सर, यश भोगे यांच्यासह इतर नागरिक उपस्थित होते.
नागरिकांना सुरळीत वीजपुरवठा, पारदर्शक बिलिंग आणि तक्रारींचे वेळेत निराकरण मिळणार का, याकडे आता लासलगावकरांचे लक्ष लागले आहे.
