विंचूरच्या ‘जय बजरंग मंडळ’च्या युवकांचा अनोखा उपक्रम
आळंदी ते पंढरपूर वारीत वारकऱ्यांसाठी मोफत चहा,फरसाण व सोनपापडीचे वाटप
न्यायभूमी
विंचूर:दि.२५ जुलै प्रतिनिधी -रोहन सरोदे
श्री क्षेत्र आळंदी ते श्री क्षेत्र पंढरपूर या पायी वारी सोहळ्यात दरवर्षीप्रमाणे यंदाही महाराष्ट्राच्या विविध भागांतून लाखो वारकरी पांडुरंगाच्या भेटीसाठी पायी प्रवास करत आहेत.
या भक्तीमय वातावरणात विंचूर येथील ‘जय बजरंग मंडळ ग्रुप’ च्या युवकांनी एक अत्यंत कौतुकास्पद आणि सेवाभावी उपक्रम राबवून वारकऱ्यांची मन जिंकली आहेत.
वारीतील पायी चालणाऱ्या वारकऱ्यांचा थकवा दूर व्हावा आणि त्यांना ऊर्जा मिळावी या हेतूने जय बजरंग मंडळाच्या कार्यकर्त्यांनी संपूर्ण पायी दिंडी सोहळ्यात भाविकांसाठी मोफत चहा, गरमागरम फरसाण आणि गोड सोनपापडीचे वाटप केले.
पाऊले चालती पंढरीची वाट; विंचूरच्या युवकांचा सेवाभाव
आषाढी वारीदरम्यान लाखो वारकरी ऊन, वारा, पावसाची तमा न बाळगता विठुमाऊलीच्या जयघोषात पायी प्रवास करतात.
या वारकऱ्यांची सेवा हीच ईश्वरसेवा मानून विंचूरच्या या तरुण सहकाऱ्यांनी स्वतः वारीसोबत राहून दिवस-रात्र मेहनत घेतली. पहाटेच्या वेळी वारकऱ्यांना उत्साह देणारा गरमागरम चहा असो वा प्रवासात शक्ती देणारा नाश्ता,या युवकांनी अत्यंत नियोजनबद्ध रीतीने या उपक्रमाचे वाटप केले.या कार्यकर्त्यांनी घेतली मनस्वी मेहनत
या उपक्रमाच्या यशस्वीतेसाठी जय बजरंग मंडळ ग्रुपच्या अनेक सदस्यांनी अहोरात्र कष्ट उपसले. यामध्ये मुख्यत्वे:
नरेश भास्कर परदेशी,कृष्णा हरिभाऊ सिरसाट, जगदीश रायजादे,निलेश अशोक महाले,पांडुरंग सोनवणे,पांगरकर मामा, करण घोडेराव,किरण देसाई,सुनील वाघ,कृष्णा महाले,दत्ता बोडके या सर्व कार्यकर्त्यांनी वारीतील भाविकांची सेवा करण्यासाठी मनापासून मेहनत घेतली.
”वारकऱ्यांच्या चेहऱ्यावरील आनंद आणि त्यांच्या मुखातून आलेले आशीर्वाद हीच आमच्या या सेवेची खरी पावती आहे,” अशी भावना या प्रसंगी मंडळाच्या कार्यकर्त्यांनी व्यक्त केली.
विंचूरच्या या युवकांनी जपलेल्या या सामाजिक व धार्मिक बांधिलकीचे आणि वारकरी सेवेचे सर्व स्तरातून विशेष कौतुक व कौतुकास्पद स्वागत होत आहे.
