बातमीचा दणका अखेर महावितरणला जाग; कामाचा फलक लावून विजेच्या खांबांचे काम सुरू
महावितरणच्या या ‘कुंभकर्णी’ कारभारावर तीव्र संताप
न्यायभूमी दि.०७ सप्टेंबर
विशेष प्रतिनिधी
स्थानिक भागात धोकादायक आणि रखडलेल्या विजेच्या खांबांबाबत वृत्त प्रसिद्ध होताच सुस्त बसलेल्या महावितरण प्रशासन आणि शासनाला अखेर जाग आली आहे.
वृत्ताची गंभीर दखल घेत प्रशासनाने तातडीने हालचाली सुरू केल्या असून घटनास्थळी कामाचा फलक लावून विजेच्या खांबांचे काम प्रत्यक्ष सुरू केले आहे. प्रसारमाध्यमांच्या बातमीमुळे वर्षानुवर्षे रखडलेला प्रश्न मार्गी लागल्याने परिसरातील नागरिकांनी समाधान व्यक्त केले असले, तरी महावितरणच्या या ‘कुंभकर्णी’ कारभारावर तीव्र संतापही व्यक्त होत आहे.
‘बातमी लागल्याशिवाय कामे होत नाहीत का?’
प्रशासनाच्या या कार्यपद्धतीमुळे जनमानसात तीव्र प्रतिक्रिया उमटत आहेत. नागरिकांनी वारंवार तक्रारी करूनही ज्या कामाकडे दुर्लक्ष केले जाते, तेच काम वृत्तपत्रात बातमी झळकताच काही तासांत कसे सुरू होते, असा सवाल आता उपस्थित केला जात आहे.
तक्रारींकडे दुर्लक्ष: सर्वसामान्य नागरिक कार्यालयाचे उंबरठे झिजवून थकतात, मात्र अधिकारी त्याकडे ढुंकूनही पाहत नाहीत.
बातमीचा धाक: प्रकरण चव्हाट्यावर येऊन वरिष्ठ पातळीवरून कारवाईची टांगती तलवार दिसताच यंत्रणा अचानक वेगाने कामाला लागते.
अपघाताची वाट पाहता का?: एखादी मोठी दुर्घटना घडल्यानंतर किंवा प्रसारमाध्यमांनी कान टोचल्यानंतरच प्रशासन जागे होणार का, असा थेट प्रश्न नागरिक विचारत आहेत.
महावितरणने स्वतःहून दक्ष राहण्याची गरज
कुणीतरी ओरड करेल, आंदोलनाचा इशारा देईल किंवा वृत्तपत्रात बातमी छापून येईल, मगच आपण खुर्चीवरून उठून काम करायचे, ही लाजीरवाणी सवय आता महावितरणने कायमची सोडून देण्याची गरज आहे.
जनतेच्या जीवाशी निगडित असलेल्या विजेच्या तारा, वाकलेले खांब किंवा इतर तांत्रिक समस्यांकडे महावितरणने स्वतःहून दक्ष राहून, नियमित पाहणी करून तत्परतेने कामे मार्गी लावली पाहिजेत.
अशी संतप्त अपेक्षा नागरिकांनी व्यक्त केली आहे.
