मराठी भाषा गौरव दिनानिमित्त विविध उपक्रमांनी शाळा दुमदुमली
न्यायभूमी न्यूज संस्थापक अभय पाटील,मुख्य संपादक दत्तात्रय दरेकर
न्यायभूमी
बाभूळगाव ( येवला )दि.२८ फेब्रुवारी पुष्पा पाटील
मराठी भाषा गौरव दिनानिमित्त आज एस एन डी इंग्लिश मीडियम स्कूल अँड ज्युनिअर कॉलेज बाभुळगाव येथे अत्यंत उत्साहपूर्ण वातावरणात विविध शैक्षणिक,सांस्कृतिक व साहित्यिक कार्यक्रमांचे आयोजन करण्यात आले.
दरवर्षी २७ फेब्रुवारी हा दिवस ज्येष्ठ कवी, नाटककार आणि साहित्यिक कुसुमाग्रज (वि. वा. शिरवाडकर) यांच्या जयंतीनिमित्त ‘मराठी भाषा गौरव दिन’ म्हणून साजरा केला जातो.
या दिवसाचे औचित्य साधून विद्यार्थ्यांमध्ये मातृभाषेबद्दल प्रेम,अभिमान आणि जाणीव निर्माण करण्याचा प्रयत्न शाळेच्या वतीने करण्यात आला.
कार्यक्रमाची सुरुवात सरस्वती पूजन व दीपप्रज्वलनाने झाली.त्यानंतर विद्यार्थ्यांनी मराठी भाषेच्या गौरवासाठी समूहगीत सादर केले.
प्राचार्य निलेश शिंदे सर यांनी आपल्या मनोगतात मराठी भाषेची समृद्ध परंपरा,संत साहित्यापासून ते आधुनिक साहित्यापर्यंतचा प्रवास आणि आजच्या डिजिटल युगात मराठीचे महत्त्व यावर सविस्तर मार्गदर्शन केले.
त्यांनी विद्यार्थ्यांना मराठी भाषेचा दैनंदिन जीवनात अधिकाधिक वापर करण्याचे आवाहन केले.
यावेळी शाळेत विविध स्पर्धांचे आयोजन करण्यात आले होते.निबंधलेखन,वक्तृत्व, काव्यवाचन,कथाकथन,शुद्धलेखन,हस्ताक्षर स्पर्धा तसेच मराठी भाषेवरील प्रश्नमंजुषा या उपक्रमांना विद्यार्थ्यांचा उत्स्फूर्त प्रतिसाद मिळाला.
काही विद्यार्थ्यांनी कुसुमाग्रज यांच्या कवितांचे प्रभावी सादरीकरण करून उपस्थितांची दाद मिळविली.
शाळेच्या परिसरात ‘मराठी भाषा अभिमान रॅली’ काढण्यात आली.विद्यार्थ्यांनी मराठी भाषेचे महत्त्व सांगणारे फलक हातात घेऊन घोषवाक्ये दिली.
“मराठी माझी मायबोली”, “मराठी भाषा – आपला अभिमान” अशा घोषणांनी परिसर दुमदुमून गेला.
कार्यक्रमाच्या शेवटी सर्व विद्यार्थ्यांनी मराठी भाषेचे जतन व संवर्धन करण्याची शपथ घेतली. या उपक्रमामुळे विद्यार्थ्यांमध्ये मराठी भाषेबद्दल आत्मीयता,आदर आणि अभिमानाची भावना अधिक दृढ झाली असून मराठी भाषा गौरव दिन खऱ्या अर्थाने उत्साहात साजरा करण्यात आला.
सदर कार्यक्रमासाठी शाळेचे विद्यार्थी शिक्षक शिक्षकेतर कर्मचारी उपस्थित होते या कार्यक्रमाचे आयोजन मराठी विभागाचे बच्छाव सर अवणकर मॅडम यांनी केले व विद्यार्थ्यांना त्यांचे मोलाचे सहकार्य लाभले.
