गोंदेगावात बिबट्याचा धुमाकुळ; शेळी फस्त; जिल्हा परिषद शाळेतील विद्यार्थ्यांच्या सुरक्षिततेचा प्रश्न ऐरणीवर
न्यायभूमी न्युज लासलगाव
लासलगाव : दि.१० सप्टेंबर कैलास उपाध्ये
गोंदेगाव येथे बिबट्याचा वावर पुन्हा एकदा वाढल्यामुळे ग्रामस्थांमध्ये आणि पालकांमध्ये भीतीचे वातावरण पसरले आहे.
काल रात्री गोंदेगाव येथील रहिवासी पंकज वाल्मिक मेथे यांची एक शेळी बिबट्याने फस्त केल्याची घटना समोर आली आहे.
या भागात सध्या दोन बिबट वावरत असल्याचा दावा नागरिकांनी केला आहे.
विद्यार्थ्यांच्या सुरक्षिततेचा गंभीर प्रश्न
ज्या ठिकाणी ही घटना घडली, त्याच्या अगदी शेजारीच जिल्हा परिषद वस्ती शाळा आहे आणि बाजूलाच ऊसाचे मोठे शेत आहे. दाट ऊसाच्या शेतामुळे बिबट्यांना लपण्यासाठी अनुकूल वातावरण मिळाले आहे.
शाळेच्या परिसरातच बिबट्याचा वावर असल्यामुळे तेथे शिकणाऱ्या चिमुरड्या शालेय विद्यार्थ्यांच्या सुरक्षिततेचा मोठा प्रश्न निर्माण झाला आहे. पालकवर्ग आपल्या मुलांच्या सुरक्षेबाबत कमालीचा चिंताग्रस्त आहे.
वनविभागाकडे तातडीने कारवाईची मागणी
या वाढत्या धोक्याची गंभीर दखल घेत सामाजिक कार्यकर्ते पंडित मुदगुल यांनी वनविभागाच्या अधिकाऱ्यांकडे तातडीची मागणी केली आहे. परिसरात तत्काळ पिंजरा लावून दोन्ही बिबट्यांना जेरबंद करावे, अशी आक्रमक मागणी त्यांनी केली आहे.
ग्रामस्थांचे प्रशासनाला आवाहन
वनविभागाने तातडीने पावले उचलून घटनास्थळी आणि शाळेच्या परिसरात पिंजरा लावावा.
वनकर्मचाऱ्यांनी रात्रीच्या वेळी या भागात गस्त वाढवावी.
अंधार पडल्यानंतर नागरिकांनी आणि विद्यार्थ्यांनी शेतात किंवा निर्जन भागात जाणे टाळावे.
मोठी जीवितहानी टळण्यासाठी वनविभागाने तात्काळ कारवाई करून बिबट्याचा बंदोबस्त करावा.
अशी तीव्र मागणी गोंदेगाव परिसरातील ग्रामस्थांमधून होत आहे.
