विंचूर येथे बंद पडलेले सीसीटीव्ही कॅमेरे तात्काळ सुरू करा; महेश शिरसाठ यांची निवेदनाद्वारे मागणी
नवीन कॅमेरे बसवण्याचीही मागणी
न्यायभूमी
विंचूर दि.२६ जुलै (प्रतिनिधी):रोहन सरोदे
विंचूर गावाची वाढती लोकसंख्या आणि सुरक्षेचा विचार करता गावातील विविध सार्वजनिक ठिकाणी बसवण्यात आलेले बंद पडलेले सीसीटीव्ही कॅमेरे तात्काळ दुरुस्त करून कार्यान्वित करावेत.
तसेच आवश्यक त्या ठिकाणी नवीन उच्च दर्जाचे सीसीटीव्ही कॅमेरे बसवण्यात यावेत,अशी ठाम मागणी सामाजिक कार्यकर्ते महेश नारायण शिरसाठ यांनी निवेदनाद्वारे प्रशासनाकडे केली आहे.
या संदर्भात महेश शिरसाठ यांनी आज, दि. २२ जुलै २०२६ रोजी ग्रामपंचायत विंचूरचे प्रशासक/ग्रामविकास अधिकारी,निफाड पंचायत समितीचे गटविकास अधिकारी (उच्च श्रेणी) तसेच लासलगाव पोलीस ठाण्याचे सहाय्यक पोलीस निरीक्षक यांना लेखी निवेदन सादर केले आहे. सदर निवेदनाची प्रत संबंधित विभागांकडे टपालाद्वारे व प्रत्यक्ष देऊन पोच घेण्यात आली आहे.
नागरिकांची सुरक्षितता आणि कायदा-सुव्यवस्थेचा प्रश्न
निवेदनात नमूद केल्यानुसार, विंचूर गावातील प्रमुख चौक, मुख्य बाजारपेठ, शाळा-कॉलेज परिसर,सरकारी व सार्वजनिक कार्यालये तसेच मुख्य रस्त्यांवर ग्रामपंचायतीच्या वतीने सीसीटीव्ही कॅमेरे बसवण्यात आले होते. मात्र, सध्या त्यातील अनेक कॅमेरे बंद अवस्थेत असून त्यांची दुरवस्था झाली आहे. त्यामुळे या महत्त्वाच्या ठिकाणी होणाऱ्या हालचालींवर कोणतीही प्रभावी देखरेख राहिलेली नाही.
सध्याच्या काळात वाढत्या चोऱ्या, घरफोड्या, रस्ते अपघात आणि सार्वजनिक ठिकाणच्या अनुचित घटनांवर आळा घालण्यासाठी सक्षम सीसीटीव्ही यंत्रणा अत्यंत गरजेची बनली आहे.
कॅमेरे बंद असल्याने एखाद्या गुन्ह्याचा तपास करताना किंवा संशयित व्यक्तींचा मागोवा घेताना पोलिसांना व प्रशासनाला मोठ्या अडचणींचा सामना करावा लागत आहे.
निवेदनातील प्रमुख मागण्या:
१. बंद कॅमेऱ्यांची दुरुस्ती: विंचूर गावातील बंद पडलेल्या सर्व सीसीटीव्ही कॅमेऱ्यांची ग्रामपंचायतीने तात्काळ तांत्रिक पाहणी करून ते दुरुस्त करावेत व त्वरित कार्यान्वित करावेत.
२. नवीन कॅमेऱ्यांची उभारणी: गावातील ज्या परिसरात कॅमेरे उपलब्ध नाहीत किंवा अपुरे आहेत, अशा संवेदनशील व महत्त्वाच्या ठिकाणी नवीन उच्च क्षमतेचे (HD) सीसीटीव्ही कॅमेरे बसवण्यासाठी सर्वेक्षण करून कार्यवाही करावी.
३. कायमस्वरूपी देखभाल व्यवस्था: बसवण्यात आलेल्या संपूर्ण सीसीटीव्ही यंत्रणेची नियमित देखभाल (Maintenance) व दुरुस्ती करण्यासाठी कायमस्वरूपी यंत्रणा किंवा ठेकेदार नियुक्त करण्यात यावा.
गावातील नागरिकांच्या सुरक्षिततेचा आणि कायदा-सुव्यवस्थेचा विचार करून प्रशासनाने या अर्जाची गांभीर्याने दखल घ्यावी व केलेल्या कार्यवाहीची लेखी माहिती देण्यात यावी.
अशी विनंती महेश शिरसाठ यांनी निवेदनाद्वारे केली आहे.
