निफाड तालुक्यातील देवगाव फाटा परिसरात चोरट्यांनी चक्क सहा शेळ्या-बोकडांवर डल्ला
न्यायभूमी न्यूज संपादकीय विभाग
न्यायभूमी न्यूज
देवगाव दि ०९ ऑगस्ट प्रतिनिधी अजीज काद्री
देवगाव फाटा परिसरात चोरट्यांनी चक्क सहा शेळ्या-बोकडांवर डल्ला मारल्याची धक्कादायक घटना उघडकीस आली आहे.
या चोरीत शेतकऱ्याचे तब्बल ३० हजार रुपयांचे नुकसान झाले आहे.
दि. ४ ऑगस्ट रोजी मध्यरात्री १ ते २ या वेळेत फिर्यादी सौ.द्रोपदाबाई बाजीराव शिंदे, वय ६०,धंदा शेती,रा.देवगाव फाटा यांच्या पत्र्याच्या शेडमध्ये बांधलेल्या शेळ्या – बोकडांवर अज्ञात चोरट्यांनी डल्ला मारला.
या घटनेत तीन वर्षांच्या चार व दोन वर्षांच्या दोन अशा एकूण सहा शेळ्या-बोकड चोरून नेण्या आल्या.
घटना घडली तेव्हा सर्व कुटुंबीय झोपेत होते. शेडची बाजू उघडून चोरट्यांनी प्राण्यांना बाहेर काढले व अंधाराच्या आडून पसार झाले.
सकाळी फिर्यादींना शेळ्या – बोकड दिसत नसल्याचे लक्षात येताच परिसरात शोध घेतला असता,शेळ्यांचा काहीच मागमूस लागला नाही.
या चोरीमुळे शिंदे कुटुंबावर आर्थिक टंचाईचे सावट आले आहे. शेळ्या व बोकड हे त्यांच्या उपजीविकेचा महत्त्वाचा आधार होता. चोरट्यांच्या या कृत्याने देवगाव फाटा परिसरात भीतीचे वातावरण निर्माण झाले आहे.
याप्रकरणी लासलगाव पोलीस ठाण्यात गु.र. नं. १९३/२५,भा.दं.वि.कलम ३७९ अन्वये गुन्हा दाखल करण्यात आला असून,स.पो.नि. भास्करराव शिंदे यांच्या मार्गदर्शनाखाली पो.हवा.संदीप शिंदे अधिक तपास करीत आहेत.
