पै.कन्हैयालाल माळी यांची कुस्ती मल्लविद्या महासंघ शिरपूर तालुकाध्यक्षपदी निवड
न्यायभूमी न्युज संस्थापक अभय पाटील
न्यायभूमी
शिरपूर (जि.धुळे) दिनांक २१ सप्टेंबर
कुस्ती क्षेत्रातील अनुभवी व कुशल प्रशिक्षक, NIS कुस्ती कोच पै. कन्हैयालाल माळी यांची कुस्ती मल्लविद्या महासंघाच्या शिरपूर तालुकाध्यक्षपदी निवड करण्यात आली आहे. त्यांच्या या निवडीमुळे शिरपूर तालुक्यातील कुस्ती क्षेत्रात नव्या पर्वाची सुरुवात होईल, असा विश्वास कुस्तीप्रेमी व क्रीडाप्रेमींनी व्यक्त केला आहे.
पै.कन्हैयालाल माळी हे गेल्या अनेक वर्षांपासून कुस्ती क्षेत्राशी सक्रियपणे जोडलेले असून, कुस्ती प्रशिक्षण आणि खेळाडू घडविण्याच्या कार्यात त्यांचे महत्त्वपूर्ण योगदान आहे. NIS (National Institute of Sports) प्रशिक्षित कुस्ती कोच म्हणून त्यांनी आधुनिक कुस्ती प्रशिक्षणाच्या तंत्रांचा अभ्यास केला असून, त्याचा लाभ स्थानिक मल्लांना मिळत आहे.
ग्रामीण भागातील होतकरू व गुणवान मल्लांना योग्य मार्गदर्शन मिळावे, त्यांच्यातील सुप्त गुणांना वाव मिळावा आणि त्यांना जिल्हा, राज्य तसेच राष्ट्रीय स्तरावरील स्पर्धांसाठी तयार करता यावे, यासाठी ते सातत्याने कार्यरत आहेत.
शिरपूर तालुक्यात कुस्तीची समृद्ध परंपरा असून, अनेक मल्लांनी या मातीतून आपल्या कर्तृत्वाची छाप उमटवली आहे. या परंपरेला आधुनिक प्रशिक्षणाची जोड देत नवीन पिढीतील मल्ल घडविणे, तालुक्यात कुस्ती स्पर्धांचे आयोजन वाढविणे, आखाडा संस्कृतीला प्रोत्साहन देणे आणि कुस्तीपटूंना आवश्यक मार्गदर्शन व व्यासपीठ उपलब्ध करून देणे, यासाठी आपण प्रयत्नशील राहणार असल्याचे पै. माळी यांनी सांगितले.
त्यांच्या निवडीबद्दल कुस्ती मल्लविद्या महासंघाचे पदाधिकारी, महाराष्ट्रातील विविध आखाड्यांतील वस्ताद, प्रशिक्षक, मल्ल तसेच कुस्तीप्रेमींनी अभिनंदन केले आहे.
त्यांच्या नेतृत्वाखाली शिरपूर तालुक्यातील कुस्तीला अधिक व्यापक स्वरूप मिळून अनेक गुणवान मल्ल राज्य व राष्ट्रीय स्तरावर चमकतील, अशी अपेक्षा व्यक्त होत आहे.
