लासलगाव येथील रेल्वे गेट कायमस्वरूपी बंद झाल्याने प्रवाशांची गैरसोय
चांदवड,मनमाड,मालेगाव,सटाणा मार्गावर अतिरिक्त बस फेऱ्यांची मागणी
न्यायभूमी
लासलगाव वार बुधवार | दिनांक २३ सप्टेंबर २०२६ निशिकांत पानसरे
लासलगाव शहर विकास समितीच्या वतीने लासलगाव बसस्थानकातून बाहेरगावी जाणाऱ्या प्रवाशांसाठी एस.टी. बससेवा वाढविण्याची मागणी करण्यात आली आहे.याबाबत महाराष्ट्र राज्याचे परिवहन मंत्री यांना निवेदन देण्यात आले आहे.
लासलगाव हे येवला विधानसभा मतदारसंघातील कांदा खरेदी-विक्रीसाठी प्रसिद्ध असलेले प्रमुख बाजारपेठेचे ठिकाण आहे. त्यामुळे विविध गावांमधून व्यापारी, शेतकरी, कामगार, विद्यार्थी तसेच नागरिक मोठ्या प्रमाणात लासलगाव येथे ये-जा करतात. लासलगाव बसस्थानकातून एस.टी. बससेवा उपलब्ध असून दररोज अंदाजे पाच हजार प्रवासी या बससेवेचा लाभ घेत असल्याचे निवेदनात नमूद करण्यात आले आहे.
रेल्वे गेट बंद झाल्याने अंतर वाढले
मागील काही महिन्यांपूर्वी लासलगाव येथील रेल्वे क्रॉसिंग कायमस्वरूपी बंद करून रेल्वे उड्डाणपूल व बोगदा सुरू करण्यात आला आहे. त्यामुळे चांदवड, मनमाड, मालेगाव, सटाणा आदी ठिकाणी जाणाऱ्या प्रवाशांना पूर्वीच्या मार्गापेक्षा सुमारे ३.५ किलोमीटर अतिरिक्त अंतर पार करावे लागत आहे.
परिणामी प्रवासाचा वेळ आणि अंतर वाढल्याने प्रवाशांवर अतिरिक्त आर्थिक भार पडत असल्याचे निवेदनात म्हटले आहे.
अंतर वाढल्यामुळे विद्यार्थ्यांनाही शाळा व महाविद्यालयात पोहोचण्यासाठी अधिक वेळ लागत आहे. त्यामुळे त्यांच्या नियमित वेळापत्रकावर तसेच शैक्षणिक बाबींवर परिणाम होण्याची शक्यता व्यक्त करण्यात आली आहे.
२०० मीटरचा रस्ता वाहतुकीसाठी खुला करण्याची मागणी करण्यात आली आहे.
या पार्श्वभूमीवर लासलगाव बसस्थानक ते बँक ऑफ बडोदा तसेच रेल्वे उड्डाणपुलाला जोडणारा अंदाजे २०० मीटरचा रस्ता तातडीने वाहतुकीसाठी उपलब्ध करून देण्याची मागणी करण्यात आली आहे.
तसेच या रस्त्याचे आवश्यक रुंदीकरण करून साईड पथ उपलब्ध करून देण्याची मागणीही निवेदनातून करण्यात आली आहे.
सदर रस्ता वाहतुकीसाठी उपलब्ध झाल्यास लासलगाव बसस्थानकातून चांदवड, मनमाड, मालेगाव, सटाणा आदी दिशेने जाणाऱ्या एस.टी. बसफेऱ्या कमी अंतराच्या मार्गाने रेल्वे उड्डाणपुलाकडे जाऊ शकतील.
त्यामुळे प्रवाशांचा वेळ वाचून त्यांना अधिक सुलभ प्रवासाची सुविधा मिळण्यास मदत होईल.
अतिरिक्त बसफेऱ्या सुरू करण्याची मागणी
लासलगाव शहर विकास समितीच्या वतीने संबंधित अधिकाऱ्यांनी या मागणीची तातडीने दखल घेऊन रस्ता कायमस्वरूपी विकसित करण्यासाठी कार्यवाही करावी.
तसेच लासलगाव बसस्थानकातून चांदवड, मनमाड, मालेगाव व सटाणा आदी मार्गांवर अतिरिक्त एस.टी. बसफेऱ्या सुरू कराव्यात.
अशी मागणी करण्यात आली आहे. निवेदनावर समितीच्या पदाधिकाऱ्यांच्या स्वाक्षऱ्या आहेत.
