महावितरण मधील बाह्यस्रोत कर्मचाऱ्यांचे ऑगस्टचे वेतन तात्काळ द्या!
१२ ऑक्टोबरपर्यंत वेतन न मिळाल्यास १३ ऑक्टोबरपासून कामबंद आंदोलनाचा इशारा
न्यायभूमी
चांदवड :दिनांक ०९ ऑक्टोंबर
महावितरणच्या चांदवड विभागांतर्गत निफाड उपविभाग, लासलगाव आणि पिंपळगाव (ब.) परिसरात कार्यरत बाह्यस्रोत कर्मचाऱ्यांचे ऑगस्ट २०२६ महिन्याचे प्रलंबित वेतन अद्याप मिळाले नसल्याने कर्मचाऱ्यांमध्ये नाराजी पसरली आहे.
यासंदर्भात कर्मचाऱ्यांनी ८ ऑक्टोबर २०२६ रोजी कार्यकारी अभियंत्यांना लेखी निवेदन देऊन प्रलंबित वेतन तातडीने अदा करण्याची मागणी केली आहे.
निवेदनानुसार, संबंधित कर्मचारी नियमितपणे वीज वितरणाची कामे करीत असूनही वेतन रखडल्यामुळे त्यांच्यासमोर आर्थिक अडचणी निर्माण झाल्या आहेत.
त्यामुळे १२ ऑक्टोबर २०२६ पर्यंत प्रलंबित वेतन अदा करावे; अन्यथा १३ ऑक्टोबर २०२६ पासून कामबंद आंदोलन सुरू करण्यात येईल, असा इशारा कर्मचाऱ्यांनी दिला आहे.
महावितरण प्रशासनाने तसेच संबंधित एजन्सीने वेतनप्रश्नी तातडीने कार्यवाही करून कर्मचाऱ्यांना दिलासा द्यावा,अशी मागणी करण्यात आली आहे. वेतन रखडण्याची कारणे, देयकांची सद्यस्थिती आणि वेतन अदा करण्याची निश्चित तारीख याबाबत प्रशासनाने स्पष्ट भूमिका मांडावी.
वेतनप्रश्नी वेळेत तोडगा न निघाल्यास संभाव्य कामबंद आंदोलनामुळे वीजसेवेवर परिणाम होण्याची शक्यता नाकारता येत नाही.
त्यामुळे संबंधित प्रशासनाने या प्रकरणाची गांभीर्याने दखल घेऊन निर्धारित मुदतीत वेतन अदा करण्यासाठी आवश्यक कार्यवाही करावी, अशी मागणी कर्मचाऱ्यांनी केली आहे.
