लासलगाव येथील जाधव गॅस एजन्सीकडून १० ते १२ दिवसांपासून पुरवठा ठप्प असल्याचा आरोप; लासलगाव शहर विकास समितीचा ‘रास्ता रोको’चा इशारा
न्यायभूमी
लासलगाव दिनांक २० ऑक्टोंबर
लासलगाव येथे ऐन सणासुदीच्या काळात लासलगावसह निफाड, चांदवड आणि येवला तालुक्यांतील सुमारे ३० हजार घरगुती गॅस ग्राहकांना सिलिंडरच्या विलंबित पुरवठ्याचा फटका बसत असल्याचा आरोप करण्यात येत आहे. हिंदुस्थान पेट्रोलियमच्या कार्यक्षेत्रातील जाधव गॅस एजन्सीकडून गेल्या १० ते १२ दिवसांपासून गॅस सिलिंडरचा पुरवठा विस्कळीत झाल्याने बुकिंग करूनही सिलिंडर मिळत नसल्याची तक्रार नागरिकांनी केली आहे.
सण-उत्सवाच्या काळात घरगुती स्वयंपाकासाठी गॅसची गरज असताना सिलिंडर वेळेत मिळत नसल्याने महिला, गृहिणी आणि सर्वसामान्य ग्राहक त्रस्त झाले आहेत. चार तालुक्यांतील मोठ्या ग्राहकवर्गाला या परिस्थितीचा सामना करावा लागत असल्याने नागरिकांमध्ये नाराजी वाढत आहे.
प्रशासनाने तातडीने लक्ष द्यावे!
निफाडचे तहसीलदार तसेच हिंदुस्थान पेट्रोलियमच्या संबंधित वरिष्ठ अधिकाऱ्यांनी या समस्येची तातडीने दखल घेऊन गॅस वितरण सुरळीत करावे. बुकिंग केलेल्या ग्राहकांना वेळेत सिलिंडर उपलब्ध करून द्यावेत, अशी मागणी लासलगाव शहर विकास समितीच्या वतीने करण्यात आली आहे.
अन्यथा ‘रास्ता रोको’ आंदोलन!
गॅस पुरवठा तातडीने नियमित न झाल्यास नागरिकांना सोबत घेऊन तीव्र ‘रास्ता रोको’ आंदोलन छेडण्यात येईल, असा इशारा लासलगाव शहर विकास समितीने दिला आहे. आंदोलनामुळे उद्भवणाऱ्या परिस्थितीची जबाबदारी संबंधित प्रशासन व एजन्सीवर राहील, असेही समितीने स्पष्ट केले.
या मागणीसाठी प्रकाश पाटील, संदीप उगले, धर्मेश जाधव, राजेंद्र कराड, चंद्रकांत नेटारे, विकास कोल्हे, शेखर कुलकर्णी, प्रमोद पाटील, उत्तम वाघ, अनिल भावसार, संतोष बोराडे, महेश बकरे, अनिल भागवत आदींनी आवाज उठवला आहे.
मुख्य मागणी : चार तालुक्यांतील ग्राहकांना घरगुती गॅस सिलिंडरचा पुरवठा तातडीने आणि नियमित करावा; अन्यथा आंदोलनाला सामोरे जावे लागेल, असा इशारा समितीने दिला आहे.
